Meeting 1ere Mai L’ile de Criz Mauricien!!! In lheur pu coze!

Mo dir un mahagrand merci a tou ban militant ek ban socialist ek ban travaiyist ek ban pessimist ek ban TOURIST ek pist oci kin vine dan nou miting zordi! Camarad, zom, fam, zenfant mo dir zot un mari merci pu zot presence paridiziac sesoir. Vrement bel nissa pu gagn zot ici.

Nou ici dan parti LCM nou in decide pu fer nou meeting asoir acoz fer noir et dan noir dimoun overt so gro lizie pli bien pu gete la verite ki dan face! Si ou met linet soleil et p enkor declar ou Mr Maca, tir couyonad la fout li dan ou poche! Lir nou meeting avec un lizie ouvert et lespri ouvert.

Si zot ferme b in ler ou ouvert li bien. Trap li bien deu cote ou ouvert tou bien lerla ou aprecie nou meeting. Paski ici dan LCM nou pa content ban dimoun ki ena lepri tipti, ki zalou, ki ena double role, et dimoune ki declar li sociab kan li pa sociab! Eh wai meeting la en kreol paski kreol c nou langaz mama! Nou avoy google un mari ferfout pu un foi et nou coz kreol.

BANLA in zaze in sante in coze et in blague et in danse zordi kan ti enkor lizour. Ban rougeu in met bel lamisik mo dir ou. Ti comend dir diskotek cot bazar vacoas. Lot cote ban zorange in bien bat tambour. Di cote des bleu nou in truve bel beze. Zot tou p vine vieu! Television p fer cinema lor zot se soir pendant ki nou meeting p roule p galoupe ici! In lheur pu ki nou coze ban camarad. In lheur pu ki nou devoile impe nou ban pense. Bizin tire met dehor. Met tou en face camarad. Bizin fer BANLA cone ki nou pense. Aret declar mouton.

Zordi camarad les 1er mai. Fete la in declare comend dir fete pu travayer! Mai travayer p gagn cout razoir mo noir! Travayer p gagn criz ar criz lekonomic! Travayer p vine someur ici dan sa pays.. et BOUG la dir li p protez travayer. B mo frere, ou p coir travayer la li un bachara li? Ou coir travayer la li pena lespri pu li comprend ki ban bel boug la p fer ar li?

Travayer in vine yoyo mo camarad! Si kaya ti la nou ti pu sant oyoyo travayer la mo frere et ser! Grand lazentie la dir ki largentie morice p fletri mo noir. Nou pa cone ki fleur li p truve dan nou pays ki emflame. Mo ban frere et mo ban ser..eski zot truv pay la p fletri zot?

Travayer p decouraze ici. ET CAMARAD ou coir ena sante ki dir ‘travayer pa decourage’! B camarad coment ou lai travayer la pa decouraze kan ou lor un bato kin fini gagn trou! CNT pe al coule. SO larou in gagn fit. Nou ban lavion so lezel in casse! Lot cote nou p declar nou mem siber lil matelo… et ou cone nou p pay bill francais ici camarad? Moricien p vine cobay dan so propre pays camarad et p pay det ban francais! Be ki couyonad sa?

Ena un lot camarad ki nou apel zom bel la terre la. Camarad, la terre p sofe. Zom bel terre la li ti p dormi pendant buku lannee. Zordi lin leve…lin reve…et line decide mo ban frere! Ki lin decide? B lin decide pu al lager pu ban victim sel by levi camarad. Et zot in deman zot mem kifer lin decide? B camarad paski lom bel terre pe envi le retour du comeback de lom de bel terre 2 camarad!!!

Un mari cinema ape deroule dan sa pays la. Ouvert zot lizie camarad.

Ena un lot mam ki apel Ticolo! Ayo mo la voix p aler sitan coze. Mai mo continue mo message. Ticolo sa ki un lot acter enkor sa. Ticolo in mari content acoz li fek gagn election camarad. Be camarad, seki ticolo pa cone, li p reve tro buku aster. Ticolo p dir li les parti di fitir mo frere. Li un parti di fitir mai kan to get li, li p tir cout fles lor un seul cote! Mam la parti fitir mai li p fer LOPPOZITION LOYAL. Li p fer loppzition de lopozition camarad. b ki couyonad sa? Mari fiasko nou p truve dan lopozition. Ki zot comprend par lopoziion loyal zot mo ban frere et ser?

Lopozition macro?!

Zordi camarad nou fer un lapel! Nou p fer un LAPEL camarad! Arete fer esclave ar mmmm sipa mssm ou sipa ki lance sosal! Join nou dan parti Crize!! Ici ou lavenir camarad.

Ouvert ou lizie ek gete. Ou un soldat camarad. Arete fer exclave sociab ar ban gro palto. Nou dan parti criz nou cone ki plan ena. Ticolo p reve, Lom la terre p rod fer film, Missie blanc li p vine vieu, lance sosal p nek fer gamat, inler pu zot change camp ban camarad.

Leconomi p vine vomi. Nou system la sante p sante mem! Un bon couyonad transport to pena dan sa couyonad pays la. La drogue p vine dipain dan pays la. Ti carpet p al dan prizon mai soulier la p jouir ar fam dan lotel! Mai moricien enkor ena lespoir. In ler pu moricien aret declar li mouton. Tir sa bouchon dan so la bouche la. Ouver to lizie to gete! Ouvert to la bouch to coze! Aret fer le sociab man ici!Aret coz le fleur le ciel et le rose! Coze seki ena pu coze.

Et camard avant nou fini sa meeting la, mo ti envi coz lor un lot mam ki p declar li saint lot cote laba! Dir moi un zafer camarad, eski ou coir si Bin Laden al dir Obama “eh mo frere mo fer alliance ar toi” – Ki kalite boufon sa matlo!!

Mo dir zot un MARI merci pu zot in lir nou meeting.Malrezmen nou penkor gagne cass tax pu aste briyani pu zot. Mai nou coment lezot nou pa done briyani, ni bus, ni TEMPO! Et rapel un zafer, kan to ena pu tir to le doit o milie la pu montre, montre li bien fierment. Arete declar le mauricien timid ar ban ki p craz to le do!